సహోద్యోగినితో ప్రేమ.. హిజ్రా అని తెలిసి కూడా పెళ్లాడిన యువకుడు

ప్రేమకు కులం, మతం, ప్రాంతం వంటి హద్దులు లేవని నిరూపించే ఘటనలు తరచూ చూస్తుంటాం. కానీ, లింగభేదాన్ని కూడా ప్రేమ అధిగమిస్తుందని చాటిచెప్తూ ఓ జంట ఒక్కటైంది. తమిళనాడులో ఓ యువకుడు తాను ప్రేమించిన హిజ్రా (ట్రాన్స్‌జెండర్‌)ను కుటుంబ సభ్యుల అంగీకారంతో వివాహం చేసుకున్నాడు. ఈ వివాహానికి సంబంధించిన ఫొటోలు ప్రస్తుతం సోషల్ మీడియాలో వైరల్‌గా మారాయి.

వివరాల్లోకి వెళితే... సేలం జిల్లా తారమంగళం సమీపంలోని ఓమలూర్‌కు చెందిన శరవణ కుమార్ (32) స్థానికంగా ఉన్న ఒక వస్త్ర తయారీ పరిశ్రమలో పనిచేస్తున్నాడు. అదే సంస్థలో సరోవ (30) అనే హిజ్రా కూడా పనిచేస్తోంది. వీరిద్దరి మధ్య పరిచయం ప్రేమగా మారింది. సరోవపై తనకున్న ఇష్టాన్ని శరవణ కుమార్ చెప్పగా, ఆమె కూడా అంగీకరించింది. దీంతో ఇద్దరూ జీవితాంతం కలిసి బతకాలని నిర్ణయించుకుని, పెళ్లి చేసుకోవాలని నిశ్చయించుకున్నారు.

వారి ప్రేమను ఇరువైపులా పెద్దలు కూడా అంగీకరించడంతో ఈరోడ్ జిల్లా గోపిచెట్టిపాళయంలోని పెరియార్ కళ్యాణ మండపంలో వీరి వివాహం ఘనంగా జరిగింది. ద్రావిడ కళగం జిల్లా అధ్యక్షుడు, న్యాయవాది మునియప్పన్ ఈ వివాహ వేడుకను ముందుండి నడిపించారు. కుటుంబ సభ్యులు, బంధుమిత్రుల ఆశీర్వాదాల మధ్య శరవణ కుమార్, సరోవ దంపతులుగా ఒక్కటయ్యారు. ఈ నూతన జంటకు పలువురు శుభాకాంక్షలు తెలుపుతున్నారు.